MAP Asina Akordu Ho Banku Mundial Ba Projetu SAPIP

Estrela inativaEstrela inativaEstrela inativaEstrela inativaEstrela inativa
 

Dili - Governu Timor-Leste liu hosi Ministeriu Agricuktura e Pescas, hetan fundus hosi Global Agriculture and Food Program (GAFSP) ba projetu foun ho titulu “Sustainable Agriculture Productivity Improvement Project (SAPIP)” (Projetu Hasa’e Produtividade Agrikultura Sustentavel)

Projetu ne’e sei implementa hosi MAP ho durasaun tinan 6, hahu hosi 2016 to 2022, ho suporta hosi Banco Mundial (Supervising Entity), Organizasoens Sosiedade Sivil, sei servisiu hamutuk ho MAP iha implementasaun iha nivel suku no FAO sei asiste MAP iha aspetu sistema M&E.

Objetivu ho projeitu SAPIP katak atu hasa’e produtividade no merkado ba produsaun hosi agrikultores ki’ik sira (small scale agriculture) iha municipios hirak ne’ebe selesionadu.

Ministru Agricultura e Pescas no Ministru Koordenador a Asuntu Ekonomiku, Eng.Estanislau Aleixo da Silva, iha loron seremonia asina akordu, iha edifisiu Banku Mundial, Lesidere Dili, iha loron 16/11, hato’o nian agredecementu tanba Ministeriu Agricultura hetan oportunidade hodi hetan apoiu finanseiru ba iha projetu Hasa’e Produtividade Agrikultura Sustentavel.

“Hau agradece tebes ba ekipa MAP ne’ebe durante ne’e halo servisu maka’as ho nune’e ohin loron MAP bele asina akordu ho banku mundial, hodi implementa programa kona ba Basia hidrografika. Ekipa ne’ebe preparadu, hau urgulhu nudar ministru tanba ekipa ne’ebe halo servisu diak”. Tenik Estanislau da Silva.

Ministru Estanislau, hatutan katak Programa basia hidrografika hanesan programa ne’ebe importante tebes, hodi bee dezenvolve sector agricultura iha Timor-Leste. Espera katak programa ne’ebe bele implementa ho diak, no hetan rezultadu diak no benefisiariu ba liu grupu agriculturu sira.

Iha fatin hanesan, Country Representative World Bank, Bolormaa Amgaabazar, hato’o deskursu katak, iha tinan barak nia laran ona, World Bank apoiu governu ba iha area ekonomia no infrastruktura, iha tinan 2006m World Bank kontinua fo apoiu ba iha sector agricultura, ne’ebe foka ba iha basia hidrografika.

Bolormaa Amgaabazar, iha espektativa katak liu hosi projetu ida ne’e, bele ajuda grupu agricultor sira hodi hasae sira nian rendimentu ne’ebe as no hadia sira nian ekonomia sustentavel ba ho diak liutan.

Practice Manager of Agriculture, Nathan Belete, iha loron hanesan, mos esplika katak ai-han no agrikultura nudar programa ne’ebe importante iha mundu. Iha Timor-Leste 75% komunidade moris hanesan grupu agriculture.

“Ami prontu ajuda ba iha dezenvolvimentu sektor agricultura no ekonomia. Espera liu hosi programa ida ne’e, bele muda komunidade agricultura nian moris no ekonomia ne’ebe diak liu”. Tenik Nathan Belete.

Projeitu SAPIP sei fo benefisiu ba uma kain hamutuk 16,500, atribui pelu menus 30% ba agrikultores feto hamutuk ema 4,950 no 10% ba agrikultores foin sa’e sira hamutuk ema 1,650.

Basia hidrografika hirak ne’ebe mak sei sai fatin implementasaun SAPIP mak hanesan, Basia hidrografika Raumoco, Suco 9 (Daudere, Serelau, Wairoke, Maina II, Lacawa, Cotamutu, Atabubu, Luro no Barifica).

Basia hidrografika Loes, Suco 16 (Gugler, Guico, Lisadila, Leote, Asulau, Purugoa, Ailelo, Smara, Limea Kraik, Laubono, Batumanu, Leolima 1, Balibo Vila, Ritabou, Meligo no Manap).

Basia hidrografika Tono, suco 6 (Naimeco Bobometo, Ust-Tacae, Banafi, Ust-Taqueno no Malekat).

Basia Hidrografika Belulik: Suco 13 (Mulo, Aitutu, Nuno-Mogue, Manutasi, Ainaro, May-ulo, Mau-Chiga, Soro, Mau-Nuno, Suro-Kraik, Leolima, Cassa no Raimea.

Projetu SAPIP sei implementa komponente 6, ne’ebe importante katak sei foka ba planeamentu integradu ba dezenvolvimentu agrikultura iha basia hidrografikas, atu fasilita formasaun grupus agrikultores no halo kapasitasaun hodi hasa’e kbi’it agrikultores sira nian, atu sporta implementasaun planu dezenvolvimentu komunidade agrikultura sustentavel, atu hakbi’it kapasidde instituisional MAP nian, liu-liu iha area servisus korparativus, planeamentu, programasaun, koordenasaun no fungsaun monitorizasaun no avaliasaun, atu jere no kordena implementasaun projetu iha area agrikultura hotu-hotu ne’ebe apoiu hosi parseiru dezenvolvimentu sira ni atu fo fleksibilidade ba MAP hodi halo reajustmentu ba programa no orsamentu SAPIP nian bainhira hasoru dezastre naturais ruma durante implementasaun SAPIP.

Hosi projetu ida ne’e MAP hakarak atinji rezultadu kona ba kresimentu iha produsaun agrikola (floresta, pekuaria, pescas, seguransa aihan no hortikultura), kresimentu iha rendementu benefisiarius sira, redusaun iha lakon pos kolleta, protesaun no konservasaun basias hidrografika, kria atividades ekonomiku ba benefiasiariu iha area rurais, kapasitasaun benefisiariu, estensionista no organizasaun sosiadade sivil no hakbiit autoridade lokal iha planeamentu, monitorizasaun no avaliasaun atividades iha suku 44.

Parseiru ho

© 2023 Ministeriu Agrikultura no Peskas. All Rights Reserved. Designed by IT MAP

Search

Login